香港新浪網 MySinaBlog
« 上一篇 | 下一篇 »
ray | 7th Jul 2009, 10:01 AM | 財經剪輯 | (42 Reads)
中鐵貨運(8089) 邀請叻人入場

07-07-2009 新報 信曉飛

中鐵貨運(8089)管理層嘅投資眼光喺市場上係數一數二嘅,投資策略更加係無人能及,好像從2008年度開始,公司唔單止保持零負債,而且長期保留大量現金係手,希望可以低潮執平貨。截至2008年底止,中鐵貨運唔單止無銀行負債,而且手持現金及現金等值物高達8.03億元,相當於依家每股持有淨現金 1.42元,如果再計及公司嘅資產,咁中鐵貨運肯定就更加值錢啦。尋日,中鐵貨運嘅股價以98仙報收,連每股淨現金值都未反映出來,股價真係抵到離晒譜,唔怪得近期有醒目投資者以每股5仙,購入咗公司1.1億股嘅認股權證,每股兌換價係1.4元,既話係每股總投資成本係1.45元。既然醒目投資者嘅成本係 1.45元,依家股價只係98仙,咁就顯得更加買啦。

醒目投資者成本1.45元

既然中鐵貨運依家股價只係98仙,咁點解醒目投資者又肯以每股1.45元入貨,高過依家48%買貨,點解會叫做醒目投資者,唔叫傻仔投資者呢?咁大家就要研究吓啦,因為中鐵貨運依家總發行股數只係5.64億,扣除大股東及機構性投資者外,街貨肯定唔會多,而尋日股份總成交量只係200萬股,所以冇話要買 1.1億股咁多啦,就算要買1,000萬股或者2,000萬股都冇咁容易,股價會俾人掃到好高,所以喺市場上係好難入手嘅,唯一方法係向公司搞門,所以佢以每股1.45元入貨,真係叻到加零一,大家完全唔使感到奇怪。既然醒目投資者嘅成本係1.45元,而大股東必美宜(0379)嘅成本係4元,咁呢個位就變得好抵買啦,而技術性走勢顯示股價向上阻力位為2.3元左右。

每股淨現金高達2.05元

中鐵貨運管理層真係好叻仔,喺2008年度趁低買入咗5,372萬股藍帆科技(8166),每股成本約50仙,同時亦大手買入咗藍帆科技嘅1.739億股優先股,每股兌換成本係11.5仙,即係話中鐵貨運總共揸住藍帆科技2.376億股。截2008年底止,藍帆科技嘅股價以1元收報,而尋日藍帆科技則以 2.49元收市,同2008年底相比,每股賺多咗1.49元,成手股票就賺多咗3.54億元。如果按中鐵貨運係2008年底止手上嘅8.03億元計算,依家賺多咗3.54億元,即係話公司手上嘅現金及現金等值物高達11.57億元,相等於每股2.05元。

根據公司年報,喺2008年度公司有9.05億元資產,當中有8.03億元係淨現金,即係話公司其他資產係1.02億元,相當於每股18仙,再加上目前每股2.05元淨現金後,中鐵貨運嘅每股資產淨值係2.23元,所以股價向上挑戰2.3元技術性阻力係好正常嘅表現。

喺今年1月及4月,中鐵貨運趁低收購咗廣東振戎石油化工全部股權,佢嘅主要業務係從事化學產品、礦物、電子產品,及石油產品之貿易。另外,公司又趁低吸納香港梅道1號物業,以及簽訂協議,動用8,235萬元收購長沙市新興大酒店物業44%權益,佢係15層之商業及酒店綜合發展項目,總建築面積為2.57萬平方米,而呢個物業嘅合作伙伴係深圳交易所上市嘅深圳賽格股份,雙方準備將呢個物業從酒店轉型至電子產品購物商場,所以增值空間好大。再者,公司又就收購上海物業而訂立備忘錄,代價為1800萬元,該物業位於上海靜安區北京西路,連同兩個泊車位,總建築面積約603.92平方米。

除咗上述業務外,公司與合作企業訂立框架協議,擬向合作企業注資1.2億元,佢主要於遵小鐵路沿線從事集裝箱、自備車租賃服務、廣告設計及管理服務等業務。根據年報,公司認為係金融市場反覆波動下,中鐵貨運嘅業務係被市場低估,而公司有大量現金在手,董事會現正積極物色切實可行嘅投資機會,長遠地提高股東嘅價值,即係話管理層不斷會搵到新投資機會,所以應該會有好多利好消息跟尾。