香港新浪網 MySinaBlog
« 上一篇 | 下一篇 »
ray | 14th Jul 2009, 10:22 AM | 財經剪輯 | (59 Reads)
榮德豐(109)坐6仙望9仙

2009年7月14日 新報 信曉飛

榮德豐(0109)近期股價走勢好強,主動買盤好積極,好像尋日尾市咁,有投資者急不及待地以全日4.2仙嘅最高位,掃咗10球貨,此乃短期股價會持續向強嘅訊號,預期後市有條件反覆向上挑戰9仙嘅技術性阻力。

榮德豐主要業務係提供投資及金融服務,銷售及買賣潤滑油添加劑、兒童遊樂設備及配件及供應鏈管理電腦系統。截至2008年12月底止,集團嘅營業額上升咗 6.4倍至2,695萬元,股東應佔虧損擴大17.2%至3,757萬元,而持作買賣投資嘅公平值虧損擴大17.9%至3,298萬元。

另外,集團喺舊年底嘅現金及現金等價物為1.39億元,流動資產淨值1.69億元,公司並無未償還銀行貸款或其他借貸,資產負債比率為零。

根據上述數據顯示,榮德豐舊年嘅營業額得果幾千萬元,手上又無負債,即係話呢間公司冇乜生意,得翻一個殼,所以日後會有好多想像空間,放乜嘢入去都得,所以股價可以干炒牛河,又可以注入任何資產,總之依家只可以靠想像而繼續炒高股價。

根據股本變化,榮德豐喺2007年2月,以每股14仙配售咗8,496萬股,期後再以每股1元配售2.04億股。完成後,公司再按每1股送8股紅股,即係話上述呢批股票變咗26億股。 其後,榮德豐再按股11.1仙,配售18.351億股。因為榮德豐嘅控股權就係呢段時間易手過,所以呢批股票嘅總成本係9.4仙。

進軍福州購物中心

喺 2008年11月份,榮德豐按每股2仙,配售咗12.84億股,集資淨額約2,490萬元,而復牌後股價不跌反升,證明配售股份係落入強者手中。聯交所資料顯示,喺舊年12月11日,榮德豐主席盧溫勝,喺場外以每股平均價2.5仙,增持咗公司4億股,使其持股量由0.08%大幅增至5.27%。

喺今年6月份,榮德豐宣布動用2億元,參股福州購物中心項目30%,再加上透過英聯創富成立各佔50%權益後,榮德豐間接入股咗福州市一個面積約8萬平方米之大型購物中心項目60%。同時,雙方各自向合營提供2億元股東貸款,並獲5年回報保證,為投資額之15%至20%。

進行股份合併重組

另外,榮德豐再建議先將股份10合1,隨後再透過金利豐配售2.31億股新股,以及配售4,620萬元3年期2厘可換股票據,配售及行使價均為合併後嘅每股 30仙,而連同向主要股東吳良好發行1.155億元可換股票據,集團合共集資淨額2.296億元,其中2億元提供合營資金,餘額撥作一般營運及日後投資。

於緊隨股份配售事項、可換股票據配售事項及可換股票據認購事項完成後,大股東吳良好嘅持股量將由依家嘅15.8%股權,增加至29.9%股權,而公司喺合併後嘅總發行股數會增加至14.77億。綜合資料表明,大股東嘅成本約達6.2仙,比現價高,所以短期股價可望率先升至6.2仙,然後再挑戰9仙嘅技術性阻力。