香港新浪網 MySinaBlog
« 上一篇 | 下一篇 »
ray | 24th Jul 2009, 07:09 AM | 財經剪輯 | (315 Reads)
東岳(189)脫胎換骨即時撲入

2009年7月24日 新報 信曉飛

東岳(0189)最近3日嘅股價走勢脫胎換骨,睇來短期升勢將會進一步加速。近期,除咗家電下鄉對東岳業務產生重大刺激作用外,去年藍星化工對山岳旗下嘅東岳氟硅材料、山東東岳有機硅材料及北京石油化工設計院提出訴訟,指其侵犯專利權,案件係去年俾北京市高級人民法院駁回,但係藍星又繼續上訴,係今年7月初,東岳終於接獲高級人民法院嘅民事裁定書,批准藍星撤回起訴,即係東岳一天都光晒,唔使俾藍星拖住晒,所以投資者立即湧入,趁低吸納東岳股份,驅使股價初次突破,後市值得睇高一線。

相信你都有用佢

東岳係全中國最大嘅製冷劑生產商之一,而製冷劑主要作兩大用途︰家居及商用空調;以及汽車空調。喺中國地產市場增長強勁之下,家居及商用空調嘅需求就更加強勁,況且依家中央實施家電下鄉嘅刺激消費政策,令到內地嘅空調需求再創歷史新高,而中國官方數據表明內地汽車銷售再創歷史新高,銷情相當火爆,而東岳作為全國最大嘅空調製冷劑生產商(包括家居、同埋汽車空調製冷劑),今年業務增長會更加明顯,估計2009年度將會係東岳業務強勁增長嘅年份,未來股價會升到好厲害。

合作夥伴夠晒勁

東岳被評為內地石油化工行業百強公司之一,以及內地專用化工業產品製造業十強之一,而2005年度更獲國家選為中國最具競爭力企業500強第四位,呢間公司真係非常有份量。依家,東岳佔內地市場近六成份額,佔全球市場則近三成,客戶包括:1)內地多家領先空調生產商,包括格力、海爾、美的、海外;2)海外空生產商,包括LG、以及三菱等,佢嘅業務真係佔咗半壁江山,所以吸引咗好多大孖沙入場,令到股東架構粒粒皆星,股價唔識升到真係有鬼囉。現在,公司正與日本新日鐵及三菱合作發展全球最大嘅清潔發展機制(CDM)業務,連合作夥伴都係夠晒勁,所以股價點會衰呢?

IFC集團都落疊

東岳係上市之前,已經成功引入國際金融公司(即IFC集團)為策略性股東,按上市後嘅價格計算,IFC嘅投資成本係87仙,同呢個位差唔多,以期周街聽 IFC會入股邊間公司,倒不如係呢個位吸納東岳,既安全,又係已經落實咗嘅事實,相信風險會更加低,回報更為可觀。按IFC入股成本計算,隻隻都有唔算嘅投資回報,而東岳只係返回成本區,所以唔使點睇,一依同IFC齊齊玩啦,最終會贏到笑。

股東陣容星級制

東岳嘅上市價係2.16元,當時休斯敦火箭班主旗下嘅投資基金之GRAHAMSTOWE、科威特投資局、以及中銀集團都以上市價認購咗東岳股份,成為佢嘅基礎投資者,再加上霸菱資產管理亦揸咗東岳好大手貨,所以東岳嘅股東真係粒粒皆星,喺咁強勁嘅陣容之下,股價遲早暴升,返回2.16元嘅上市價冇乜問題。總之,唔使講太多,趁低買貨,睇IFC頭就得啦,問題只係最終會贏幾多而已。