香港新浪網 MySinaBlog
« 上一篇 | 下一篇 »
ray | 6th Aug 2009, 07:13 AM | 財經剪輯 | (119 Reads)
匯盈(821)飛得更高更遠

2009年8月6日 新報 信曉飛

匯盈(0821)啱啱出咗中期業績期,股價立即跳出長期橫行區,走勢好強,睇來短期股價會升得幾緊要,依家佢每股資產淨值係1.649元,現價折讓好大。仲有,截至2008年底止,匯盈嘅庫存現金及銀行結餘高達、以及其進流動資產分別係3.02億元及2.76億元,總共5.78億元,扣除7,701萬元嘅流動負債後,匯盈嘅淨流動資產高達5億元咁滯,按依家3.71億嘅總發行股份計算,每股可透現嘅現金高達1.35元。

公布業績股價異動

尋日,匯盈股價僅以95仙報收,唔單止比每股1.35元嘅現金低,比每股高達1.649元每股資產淨值更低,所以現價買入真係物超所值。如果公司爽手啲,喺中期業績派高息,依家買入真係有機會財息兼收,點都好,呢係股票最少會要反映每股1.35元嘅現金值先啱,假使公司積極少少,好似2007年咁,股價係一星期就可以狂升3.24元,夠晒過癮啦。

匯盈主要從事金融服務業務,其中包括提供首次公開售股、合併與收購及其他企業融資相關顧問服務、證券、期貨及期權經紀及買賣。喺2007年度,集團把握市場高潮,以每股2.2元配售咗5,068萬股,期後再以每股4.2元配售咗6,100萬股,就係呢兩次決定性嘅投資,使到匯盈可以坐擁巨額淨現金,一來可為公司提供發展機會,二來公司有條件將部份現金派發予股東,回饋股東嘅長期支持,所以無論公司點做都好,對股價始終都係好正面嘅。喺公司打出中期業績期後,佢嘅股價就跳出長期橫行區,睇來中期業績會有驚喜,先至有熱錢湧入,現價比佢每股淨現金低好多,應該實食無黐牙嘅。

個個都升匯盈一樣

舊年,港股處於熊市,恒指由高位急挫,成交越來越低,第三季嘅成交額跌至636億元,而最後一季更萎縮至約508億元,所以匯盈嘅證券經紀業務係好難捱嘅。但係今年就完全唔同,港股進入顯著牛市,恒指越升越有,總成交金額不斷提升,新股上市開始活躍,佣金收入肯定會明顯增多,孖展利息收入應該會多好多,新股及供股包銷嘅收入亦有倍增機會,所以基本業務嘅表現,今年好值得睇好,股價遲早會大幅上升,唔信,你睇吓光大證券上市搶得幾緊要,高盛證券股價升得幾緊要,就算連申銀(0218)嘅股價都升好多,所以匯盈嘅股價點可以唔升呢?

低潮買地已賺大錢

喺 2008年度,匯盈成功夥拍麥格理(Macquarie Macau),共同成立一家各佔50%股權之合營公司,雙方各自向合營公司出資9,500萬元,以收購澳門一幅3億元嘅土地,而項目總投資額逾6億元。因為呢幅土地係喺2008年9月,正直澳門地產市場最低迷時期所購入,所以依家已經升值咗好多。根據匯盈行政總裁兼執行董事辛定華係舊年所講,匯盈與麥格理組成嘅基金,將以高檔住宅發展項目為主,未來仲會積極喺澳門物色收購項目,目標回報率介乎25%至30%。

仲有,佢2007年10月,匯盈擬以總代價3.84億元,向香港華人(0655)收購澳門華人銀行股份60%股本,代價其中3.24億元係以現金支付,餘額6,000萬元則由公司以每股6元,向香港華人發行1,000萬股新股之方式支付,但係收購事項最終係終止咗。雖然係咁,從呢件事情上,已經可以睇到匯盈嘅發展唔止咁簡單,相信係市好嘅環境下,匯盈會有大把發揮機會,所以股價可能飛得好高架。