香港新浪網 MySinaBlog
« 上一篇 | 下一篇 »
ray | 26th Aug 2009, 07:19 AM | 財經剪輯 | (270 Reads)
優良紀錄現突破第一電訊(865)大時代

2009年8月26日 新報多喜析骰

講到跑實力,真係要提隻第一電訊(0865),呢隻股份自2000年底於創業板上市以來,一直都在默默耕耘,並終於2006至2008連續3年取得盈利,並成功在去年底升級跳做主板,集團主業應可食正全球3至4G嘅電訊大革新時代,每股資產淨值高達0.5元,而手持現金量亦達5.07億元,兩項數據拍起每股不足4毫嘅市價比較,令呢隻股份顯得特別吸引,而矚目嘅係,呢隻股份近期在大成交下連續幾日出現幾支大陽燭,並一舉抽上今年新高水平,要留意上市近9年期間,第一電訊只在2002年做過兩次批股,其後一直未做過任何資本動作,咁乾淨嘅資本紀錄,亦係集團醞釀大動作嘅另一賣點。

業績漸入佳境跳升主板

第一電訊主要在香港、中國、馬來西亞、菲律賓、澳洲及英國分銷網絡貿易同直銷網絡,從事分銷及零售買賣多種品牌流動電話及相關配件,集團在2000年底以 0.82元在創業板招股上市,前身編號為8110,其後曾在2002年分別以0.77元及0.76元配售過兩次新股集資,早年業績一直表現上上落落,但到近3年則漸入佳境,2006至2008年盈利分別為4,072萬元、6,354萬元及4,095萬元,雖然2008年咁艱難,但業績受影響程度較同業為低,期內營額跌9.1%至73.95億元,股東應佔溢利降35.6%至4,095萬元,難得係毛利率維持4.8%相若水平,年內銷售510萬部流動電話,涉及分銷流動電話及配件營額總值71.1億元;至於零售流動電話及配件營業額則為2.78億元。

集團亦以MOBIE CITY品牌在香港經營,並於大埔、觀塘及東涌開設3家新門市。去年底,集團在九龍及新界主要住宅區及商場經營7家門市,年內馬來西亞及菲律賓附屬公司分別取得19款及33款三星流動電話新型號分銷權。

截至去年底止,集團資產淨值為9.73億元,每股申算為0.5元,其中手頭現金達5.07億元,每股0.26元,以尋日收市價0.385元計算,總市值只為 7.5億元,同前述兩個數據相比,真係幾夠吸引力,而未來則係全世界流動電話革新大時代,各類電話推陳出新,第一電訊身處前線,自然食盡第一杯羹,估計今年業績應重現突破,以回復2007年業績衡量,市盈率11.8倍,以近期異動走勢估計,可能亦有其他大動作醞釀,扒冷值堪值留意。