香港新浪網 MySinaBlog
« 上一篇 | 下一篇 »
ray | 8th Sep 2009, 08:16 AM | 財經剪輯 | (113 Reads)
科龍(921)母公司注資 目標3.3元實食冇黐牙
2009年9月8日 新報 信曉飛

科龍(0921)啱啱派咗嘅中期業績,半年盈利顯著上升1.4倍至1.49億元,假設下半年度嘅盈利同上半年一樣,原有業務嘅全年盈利就高達2.98億元。係今年年中,科龍獲母公司青島海信以12.38億元人民幣作價,注入咗冰箱、空調生產及白色家電營銷在內嘅白色家電資產,包括海信(山東)空調全部權益、海信(浙江)空調51%權益、海信(北京)電器55%權益、青島海信日立空調系統49%權益、青島海信模具78.1%權益及青島海信營銷之白色家電營銷資產,而代價則以每股人民幣3.42元配售咗3.62億股A股支付。

根據收購文件,科龍呢次收購嘅資產,係2006、2007同埋2008年度嘅營業額分別為45.7億、50.9億及48億元,盈利分別係1億元、1.24億元及3,809萬元,而根據管理層估計,相關資產係2009年度,將可提供唔少於6,380萬元盈利,約7,506萬元港幣,而計及收購盈利貢獻,估計科龍係2009年度嘅盈利會高達3.73億港元,以擴股後發行股數之13.54 股計算,每股盈利高達27.5港仙。按尋日收市價計算,科龍嘅預測市盈率只係7倍左右,與恒指嘅21倍市盈率相比,估值極之偏低,所以當科龍追回恒指市盈率嘅話,合理價係5.8元。如果保守啲咁睇,科龍股價只係反映12倍市盈率,目標價已經係3.3元,回報都好唔錯啦。

綜合產能近1500萬套

根據科龍嘅公司網站資料,母公司按規劃將白家電資產注入科龍後,科龍就擁有海信、科龍、容聲呢3個中國馳名商標,擁有海信空調、海信冰箱、科龍空調、容聲冰箱呢4個中國馳名產品,主導產品涵蓋冰箱、冰櫃、洗衣機等多個領域,生產基地分布於順德、青島、成都、南京、潮州、揚州、蕪湖、營口等省市,形成咗年產能 600萬套空調、800萬台冰箱及70萬台冰櫃嘅強大產能。

距離90年代高位好遠

另外,科龍定咗嘅發展目標係:經過3至5年發展,公司銷售收入總額達會400億元。係今年上半年,公司原有業務嘅營業額係44.36億元,全年都係90億元左右,計及啱啱注入咗資產,全年營業額約達50億元,所以新舊業務嘅總營業額係140億元左右,未來幾年仲會有好強勁嘅增長動力,所以目標係先睇3.3 元,破位後追回恒指市盈率,就可以睇番5.8元,但係仍然距離90年代嘅十幾蚊高位好遠。