香港新浪網 MySinaBlog
« 上一篇 | 下一篇 »
ray | 28th Sep 2009, 10:36 AM | 財經剪輯 | (178 Reads)
食正國家醫改政策 國藥(1099)上望目標27元
2009年9月28日 新報 信曉飛

國藥控股(1099)主要向國內醫院及分銷商等分銷藥物及藥品、經營醫藥連鎖店,以及分銷實驗室用品、製造及分銷化學試劑、生產及銷售藥品。按公司喺 2008年嘅收入計算,並根據中國醫藥商業協會嘅資料,國藥係中國最大嘅藥品及保健品分銷商及領先嘅供應鏈服務供應商,並經營中國最大嘅全國藥品分銷網絡。

手揸兩隻A股

若按所佔中國醫藥分銷行業總收入嘅百分比計算,國藥嘅市場份額自2003年嘅約4.4%增至2008年嘅10.8%,大幅拋離最大競爭對手,領先市場份額嘅差距由2003年嘅0.1%以下擴大至2008年嘅 6.1%,所以市場領導地位相當突出。而喺國家推行嘅8500億元額外醫療保健改革計劃下,相信中國醫藥行業嘅增長會加快,而國藥係行業性大哥,所以受惠程度會好明顯。

根據招股書預測,國藥預期截至2009年12月31日止年度,股東應佔純利不少於8.4億元人民幣,備考每股基本盈利不少於人民幣 38分,折合約45港仙。按上星期收市價計算,預測市盈率約44.4倍,估值仍然合理,而根據樂觀預測,估計國藥嘅股價可升至60倍市盈率,相當於27元左右,較16蚊上市價高69%。

依家,國藥手上揸住兩隻A股,分別係:1)持有國藥股份44.01%權益,其A股(滬:600511)於上海證券交易所上市,主要從事醫藥分銷、物流服務及製藥業務;2)持有一致藥業38.33%權益,其A股(深:000028)及B股(深:200028)於深圳證券交易所上市,主要從事醫藥分銷、製藥及醫藥零售業務。截至2009年5月止,集團嘅分銷網絡遍布中國19個省、直轄市及自治區嘅25個分銷中心,直接客戶包括全國約36.4%嘅醫院,另有逾2.4萬名其他客戶,例如醫藥分銷商、零售藥店及其他醫療機構。目前,集團主要透過分銷網絡提供全線產品,包括超過 2.2萬種不同類型藥品及保健品,包括處方藥(品牌藥及普藥)及非處方藥,以及個人護理產品及醫療用品。

增長勢頭好勁

在 2006、2007及2008年度,集團嘅營業額分別係237億、311億及382億元,盈利分別係1.01億、3.8億及5.86億元,增長勢頭好勁。截至2009年5月止個月,集團營業額上升20.3%至180.5億元,股東應佔溢利則上升41.9%至4.22億元,所以招股書預測全年賺8.4億元應該冇問題。