香港新浪網 MySinaBlog
« 上一篇 | 下一篇 »
ray | 1st Jun 2007, 00:25 AM | 股海心經 | (605 Reads)

喪屍出籠

精彩文章 - 轉貼自 陸羽仁的blog

近期股仔勁升潮,陸Sir係文中有詳細講解,值得細看! 

 

 

  剛剛在周一頭條日報專欄講起細價股的大陸式炒法,昨日那些「雞股」已經炒到禾雀亂飛,升三幾十個巴仙等閒事,愛好炒股之的股民,踫上了10年一遇的炒股奇景,不愛炒股的網友,就如蛋家雞一樣,見水唔飲得。 

  我話係「奇景」,是因為個個浪都會炒吓的雞股,莊家永遠存在,大市氣氛一到,他們就會出動,但今個浪雞股炒作範圍之大,時間之長,升幅之多,確係罕見。 

  我今日在頭條日報專欄引述兩種不同講法,一種講法話這些雞股炒浪唔維持得耐,短則幾個星期玩完,長則幾個月玩完。另一種講法話由於參與者變了,手法不同,玩得幾耐好難講。我自己傾向相信後一種講法,就係所謂「地下QDII炒起雞股」。 

  傳統本地莊家手法,大大概概有個譜,股價無去得咁急咁狼,個股價圖做得好靚,一級級咁上,升下又回番的,回完又再上,總之好似一條45度角打斜曲折向上的線,由股價圖的左下方延伸到右上方,一直向上。升到咁上下就派貨,陰陰跌,跟住玩完。而炒這些莊家股的散戶,有老鬼有新仔,老鬼叻的,炒到咁上下走緊的貨,收番的本。新仔一係膽細一係心雄,膽細的升幾格就走了,心雄者一直坐到尾,跟咗人番屋企。 

  不過如今炒雞股者,好多都係大陸錢,例如有個本地大戶,手下有好幾隻殼,佢都唔再自己炒,每間公司都平價批一大手貨俾大陸莊家去玩,自已揸番10、20%,任大陸莊去舞,大陸莊返鄉吓吹吓雞,會引來大陸客,吸引到一大批大陸散戶來炒,結果炒到飛沙走石,隻股成倍成倍咁升,本地大戶都大開眼界,嘩估唔到大陸莊家咁狼。 

  陸羽仁就話,呢個做法似賭場的賭廳,賭場大老細唔想咁辛苦自己去搞,將場內賭廳一個一個咁判出去,俾外人來搞,夠膽來搞者,都有咁上下板斧,除了有水源之外,仲有一定客源,招朋喚友,叫番哂自己的同鄉兄弟來賭,搞到個場好旺,因為好來以前唔來玩者,都因為賭廳主拉入來賭幾手。 

  所以而家愈來愈多大陸人來港開戶炒股,有經紀行話大陸客已佔新客一半,估計將來新客更以大陸客為主,這種地下QDII搬水來香港,比合法的QDII多好多,而且地下QDII專炒細價莊家股。當大家以為大陸散戶主要受阿爺擴大QDII的概念吸引而來,我就話受大陸莊家號召而來者,一樣咁多。 

  新時代有新事物,不能以老式思維觀之,話佢炒幾日就玩完,今次可能會玩耐少少。經紀張話,大陸散戶和香港老鬼散戶的最大分別,就是大陸散戶買股票興死揸,既無止蝕概念,亦無止賺概念,股票升好多都唔走;同佢地傾吓就發現,內地股票少,他們的經驗是買錯貨跌了下來,死揸會出生天。所以大陸莊家雖然炒得狼,股價升得急,但做起上來比想像中容易,因為以前股票一升,散戶就走清,莊家做上去費力,想派貨又派唔到。但大陸散戶見股價狂升都坐定定唔走,因為他們見慣升十倍八倍的雞蛋股、豬肉股,認為還有大升在後頭。只要揸重貨的散戶唔走,莊家再大力推高就好容易。 

  各位網友,你慢慢就會發現,即使你N年前買落的細價雞股,曾經跌到阿媽都唔認得,死咗係度幾年郁都唔郁,你已經將佢撇哂帳,但佢而家慢慢又會好似喪屍咁爬番起身,跟往好生猛咁隨街跳,你開心之餘,會好心急咁沽清貨,同呢條喪屍脫離關係,但要小心喪屍俾人借屍還魂,最後改個名生猛到你唔信。我o既建議係既然已經衰咗咁耐,雖然唔好唔沽,但亦唔好一次沽清,慢慢逐少沽,參加吓喪屍派對亦無壞,佢都害你咁耐,你咬番佢兩啖都好應該,見唔對路時才一Q清貨。 

  新買雞股的網友的處境有少少唔同,若買中升得太恐怖的雞股,沽番一部份出去收番的本絕對無壞,總之量力而為啦。 

http://www.hkheadline.com/blog/reply_blog.asp?f=5YTPBH5B812303&id=36209  

留言(0) | 引用(0) | 話題(股市)